FIFA WC 2018: U Bufaransa bwegukanye igikombe cy'Isi nyuma yo gutsinda Croatia-eachamps.rw

FIFA WC 2018: U Bufaransa bwegukanye igikombe cy'Isi nyuma yo gutsinda Croatia

www.eachamps.rw

Ikipe y'igihugu y'u Bufaransa yegukanye igikombe cy'Isi cya 2018 nyuma yo gutsinda Croatia ibitego 4-2 ku mukino wa nyuma wabaye kuri iki Cyumweru tariki ya 15 Nyakanga 2018.

Kuva tariki ya 14 Kamena kugeza 15 Nyakanga 2018 mu Burusiya haberaga imikino ya nyuma y'igikombe cy'Isi aho cyaje kwegukanwa n'u Bufaransa kiba igikombe cya kabiri mu mateka y'iki gihugu nyuma yicyo begukanye mu 1998.

Croatia n'u Bufaransa niyo makipe yageze ku mukino wa nyuma w'igikombe cy'Isi cya 2018 cyari kimaze iminsi kibera mu Burusiya, Croatia yasezereye u Bwongereza muri 1/2 ni mu gihe u Bufaransa bwasesereye u Bubiligi.

Croatia yinjiye mu kibuga ikinisha imbaraga cyane ubona ko ishaka igitego hakiri kare ariko ntibyabakundira dore ko baje gukorwa mu nkokora n'u Bufaransa ku munota 18 ubwo Mario Mandzukic yatsindaga igitego n'umutwe kuri kufura yari itewe na Antoine Greizman.

Croatia ntiyacitse intege yakomeje gusatira ishaka kwishyura maze ku munota wa 28 Ivan Persic yaje kwishyurira Croatia ku ishoti rikomeye yatereye mu rubuga rw'amahina. Gusa ibi ntibyamaze kabiri kuko ku munota wa 38 Antoine Greizman yaje gutsindira u Bufaransa igitego cya kabiri kuri penaliti nyuma y'uko Ivan Persic yari akoreye umupira mu rubuga rw'amahina.

Gutangira bakina neza igice cya kabiri ntabyari bihagije ngo Croatia yishyure igitego yari yatsinzwe mu gice cya mbere. Ibintu byaje kuba bibi cyane ku ruhande rwa Croatia ku munota wa 59 ubwo Paul Pogba ubwo yatsindaga igitego cya 3 hari mbere y'uko ku munota wa 65 Kylian Mbappe atsinda igitego cya 4 ku mupira yari ahawe na Hernandez.

Ku munota 69 Mario Mandzukic yaje gutsinda igitego cya kabiri cya Croatia nyuma y'amakosa y'umunyezamu Lloris washatse kumucenga ariko bikamunanira.

Croatia yakomeje kureba uburyo yakishyura ibi bitego ariko biranga maze umukino urangira ari ibitego 4 by'u Bufaransa kuri 2 bya Croatia, u Bufaransa buhita bwegukana igikombe cy'Isi cya 2018.

Umutoza w'u Bufaransa, Didier Deschamps utwaye iki gikombe akoze amateka yo gutwara igikombe cy'Isi ari umukinnyi agitwara ari n'umutoza kuko yari mu ikipe y'u Bufaransa yegukanye igikombe cy'Isi cyo 1998.

1 month ago | by Canisius Kagabo

Leave a Comment:

Comments(0):

You May Also Like

Loading...

Join our Newsletter