Uyu munsi ni isabukuru y’ibyamamare bibiri mu mupira w’amaguru ku Isi-eachamps.rw

Uyu munsi ni isabukuru y’ibyamamare bibiri mu mupira w’amaguru ku Isi

www.eachamps.rw

Abo ni Cristiano Ronaldo na Neymar Júnior, bombi ni abakinnyi b'ibyamamare cyane ku isi, bombi bari mu bakinnyi batanu ba mbere binjiza amafaranga menshi ku isi mu kazi kabo, bombi bavutse tariki 05 z'ukwezi kwa kabiri.

Cristiano Ronaldo dos Santos Aveiro yavutse ku itariki nk'iyi z'uku kwezi mu 1985 mu birwa bya Madeira mu majyepfo ya Portugal hari kuwa kabiri.

Neymar da Silva Santos nawe yavutse ku itariki nk'iyi mu 1992, hari kuwa gatatu, mu mujyi wa São Paulo muri Brazil.

Neymar da Silva Santos Júnior yujuje imyaka 28, ni umukinnyi wamenyekanye akiri muto kuko ku myaka 17 yari yatangiye gufasha ikipe ye ya Santos gutwara ibikombe bya shampiyona.

Mu 2011, afite imyaka 18 yafashije cyane iyi kipe gutwara igikombe cya Copa Libertadores (cy'amakipe yabaye aya mbere muri Amerika y'epfo) igikombe iyi kipe yaherukaga mu 1963.

Mu 2012 yahise atorwa nk'umukinnyi warushije abandi bose muri Amerika y'Epfo, Barcelona ihita imugura.

Muri Barça, afatanyije na Messi na Suarez batwaye ibikombe bitatu bikomeye mu mwaka umwe; icya shampiyona, igikombe cy'umwami n'icya UEFA Champions League.

Mu 2017 yaguzwe miliyoni $263 ajya mu ikipe ya Paris Saint-Germain, nta wundi mukinnyi mu mateka y'umupira w'amaguru uragurwa ako kayabo.

Umwaka wa mbere akihagera yatowe nk'umukinnyi mwiza muri shampiyona y'Ubufaransa.

Ubu amaze kuhatwara ibikombe bibiri bya shampiyona, ibikombe bya Coupe de France na Coupe de la Ligue.

Ikipe y'igihugu cye La Selesao de Brasilia amaze kuyikinira imikino 101 yayitsindiye ibitego 61, aza ku mwanya wa gatatu inyuma ya Pelé (77) na Ronaldo da Lima (62).

Ku rutonde rwa Forbes rwa 2019, Neymar ni umukinnyi wa gatatu (mu mikino yose) winjiza amafaranga menshi ($105 million ku mwaka), inyuma ya Messi wa mbere na Cristiano Ronaldo.

Cristiano Ronaldo, bamwe bavuga ko ubu ari we mukinnyi ukomeye kurusha abandi ku isi.

Ikidashidikanywaho ni uko ari mu bakinnyi bakomeye cyane b'umupira babayeho n'abariho ubu ku isi.

Uyu munsi yujujye imyaka 35 y'amavuko, ni umukinnyi w'ibigwi birebire kuko amaze gutwara ibikombe 29 mu mupira w'amaguru.

Muri byo harimo ibikombe bitandatu bya shampiyona eshatu z'ibihugu amaze gukinamo, ibikombe bitanu bya UEFA Champions League, iri rushanwa ryo amaze no kuritsindamo ibitego byinshi kurusha abandi barikinnye bose (128).

Kuva yatangira gukina umupira mu rwego rw'ababigize umwuga, Ronaldo amaze gutsinda ibitego birenga 700.

Amaze gutwara ibihembo bitanu by'umukinnyi urusha abandi bitangwa na FIFA buri mwaka.

ESPN ivuga ko CR7 ari we mukinnyi wamamaye kurusha abandi bose mu mikino yose ku isi (2019).

Kugeza mu kwezi kwa mbere gushize, ni we muntu ukurikirwa n'abantu benshi cyane (miliyoni 200+) kuri Instagram.

Ronaldo afite abana bane, abakobwa babiri n'abahungu babiri.

Mu bigwi bikomeye bya Cristiano Ronaldo na Neymar Júnior bombi nta wurabasha kwegukana igikombe cy'isi.

Abakunzi b'umupira w'amaguru, n'abafana babo by'umwihariko, ku mbuga nkoranyambaga zinyuranye babifurije isabukuru nziza.

Neymar na Cristiano bavukiye itariki imwe

5 months ago | by Christian Shema

Post Comment

You May Also Like

Loading...

Join our Newsletter