IGICE CYA 2: Amateka ya Sinema mu Rwanda nyuma y’Abakoloni-eachamps.rw

IGICE CYA 2: Amateka ya Sinema mu Rwanda nyuma y’Abakoloni

www.eachamps.rw

Mu nkuru yacu y’ubushize, twabagejejeho mmwe mu mateka yaranze sinema nyarwanda kuva ku gihe cya gikoroni. Muri iyi nkuru tukaba tugiye gucumbukura tubagezaho bimwe mu byaranze Sinema mu Rwanda mu gihe cya Repuburika ya Mbere n’iya Kabiri, ni ukuvuga hagati y’umwaka wa 1962 na 1994.

U Rwanda rumaze kubona ubwigenge tariki ya 1 Nyakanga 1962, sinema ntiyigeze iba mu by’ukuri muri gahunda za Reta dore ko itari no muri gahunda y’ubutegetsi bwa gikoroni bwari busimbuwe.

Mu by’ukuri, nta hererekanwa rya gahunda ya sinema itari iriho. Byasabaga kuyitangiza ariko ntibyabaye.

Mu by’ukuri, ukubura ku ikubitiro k’umuco wo gukoresha amashusho ayega (lack of motion pictures’culture) kunagaragarira ku itinda ry’ishingwa rya tereviziyo y’igihugu yatekerejwe nk’umushinga mu kwezi k’Ugushyingo 1986 (hasigaye amezi umunani ngo u Rwanda rwizihize isabukuru y’imyaka 25 rwari rumaze rwigenga).

Gusa, na bwo uwo mushinga waje guhera mu nyandiko igihe cy’imyaka ine kuko Tereviziyo y’u Rwanda yatangiye kwerekana amashusho yayo ya mbere tariki ya 31 Ukuboza 1990, ikora iminsi itatu mu cyumweru (ku wa gatatu, ku wa gatandatu no ku cyumweru).

N’ubwo nta Banyarwanda batinyutse gukora firime mu gihe cy’imyaka irenga 20 u Rwanda rubonye ubwigenge, firime mu Rwanda zerekanwaga cyane cyane mu mashuri yisumbuye n’amakuru ndetse hakaba hari n’amazu mberabyombi y’abantu ku giti cyabo yerekanaga firime ziturutse hanze.

Nk’urugero, iyamenyekanye cyane mu mugi wa Kigali ikaba izwi ku izina ryo “kwa Mayaka” ngo yaba yarubatswe hagati mu myaka y’1970. Ubu ikaba izwi ku izina rya “Cine Elmay”.

Mu birebana no gukora ndetse no kuyobora firime, Umunyarwanda Gaspard Habiyambere ni we wabaye mukomarume ubwo yayoboraga agafirime kagufi k’umwibariro Manirafashwa mu w’1986 (Gakunzi, R., 2012).

Uyu akaba yafatwa nk’Umunyarwanda wa mbere wabashije kuyobora firime (film director) dore ko ako gafirime ke kabashije no kumenyekana ku rwego mpuzamahanga.

Twavuga ariko ko uwaje kugira uruhare rukomeye muri sinema nyarwanda y’igihe cya Repuburika ya kabiri ari Bwana Kalisa Callixte wari uzwi mu itorero ry’ikinamico “Indamutsa” nk’umutoza w’abakinnyi. Iri torero rikaba ryari ryarashinzwe mu w’1984.

Kalisa Callixte akaba yari mu itsinda ryakoze firime mpamo “Rwanda: Igihugu gitera imbere” (1987, 56 min) yakozwe n’Ikigo cy’igihugu cy’Itangazamakuru (ORINFOR) ku bufatanye na CINE-MUNDO.

Iyi firime mpamo ikaba yarakozwe igaragaza ibyari bimaze kugerwaho mu gihugu mu gihe cy’imyaka 25 u Rwanda rwari rumaze rwigenga.

By’umwihariko muri uwo mwaka w’1987, Kalisa Callixte, atewe inkunga n’Abanyakanada, akaba yarayoboye firime mpamo yise “Rwanda, les Collines de l’effort” (58 min), by’umwihariko amashusho yayo akaba yarafashwe mu buryo butari ubwa “videwo” dore ko yari yakoresheje imfatashusho ya “16mm”.

Nyuma y’umwaka, mu Rwanda hakorewe firime Gorillas in the Mist (1988) ku iyicwa rya “Nyiramacibiri” (Diana Fossey) iyi tukaba tuyishyira mu cyiciro cya “firime ku Rwanda” zayobowe n’abanyamahanga ariko zivuga ku Rwanda; ikaba yarakozwe n’Abanyamerika.

N’ubwo umuco wo gukora firime wari ntawo muri rusange, ikibabaje ni uko n’umwe mu bari batangiye gutanga icyizere kuri sinema nyarwanda, Bwana Kalisa Callixte, yaje kwicwa arashwe tariki ya 6 Mata 1994, bucya jenoside yakorewe Abatutsi itangira, ari na bwo uretse na sinema, ubuzima bw’igihugu mu nzego zose bwari bwinjiye mu icuraburindi.

Twagendeye ku ncamake y’amateka yashyizwe ahagaragara na mwarimu Jean Claude Uwiringiyimana mu gitabo yashyize ahagaragara kuri sinema nyarwanda.

 

7 months ago | by Eachamps

Post Comment

You May Also Like

Loading...

Join our Newsletter