Airtel Rwanda yamuritse ipaki nshya yiswe ‘Combo byose pack’ ikubiyemo SMS, Interineti ndetse n’iminota yo guhamagara-eachamps.rw

Airtel Rwanda yamuritse ipaki nshya yiswe ‘Combo byose pack’ ikubiyemo SMS, Interineti ndetse n’iminota yo guhamagara

www.eachamps.rw

Sosiyete y’itumanaho ya Airtel Rwanda, yashyize igorora abafatabuguzi bayo itangiza uburyo budasanzwe bubafasha kugura mu buryo bukomatanyije ipaki ya internet, message n’iminota yo guhamagara badahenzwe.

Iyi paki yiswe ‘Combo byose Pack’ yatangijwe kuri uyu wa 20 Werurwe 2020, igamije kugeza ku bakiliya ba Airtel Rwanda internet ihendutse, bakabasha guhamagara no kohereza ubutumwa bugufi baguze ipaki imwe.

Airtel Rwanda yasobanuye ko abakiliya bazaba bafite amahitamo yo kugura iyi paki mu buryo bune butandukanye, bwiza kandi bworoshye.

Hari imara iminsi ibiri igurwa 500Frw, imara icyumweru igura 1500Frw n’izimara ukwezi imwe igura 5000Frw n’iya 15,000Frw.

Kugura iyi paki umukiliya akanda *255*6# maze agakurikiza amabwiriza bitewe n’ipaki ashaka kugura, uburyo bunamuha uko ashobora kuba yayigurira inshuti nk’impano cyangwa akareba ingano y’iyo asigaranyeho.

Ni ipaki iki kigo cy’imari cyatangije mu rwego gukomeza gufata neza abakiliya nk’uko cyabyiyemeje, kuko muri Airtel, umukiriya ari umwami.

Ubwo yatangazaga itangizwa ry’iyi paki nshya, Umuyobozi mukuru wa Airtel Rwanda, Raoul Bedi, yavuze ko izi paki zihita ziboneka hose mu Rwanda.

Ku bakiliya bashya, icyo basabwa gusa ni ukugura simukadi ya Airtel bagatangira kuryoherwa n’iyi paki ikubiyemo byose.

Ati“Tumaze kwiga neza ku byifuzo by’abakiliya bacu, intego yacu ni ukugeza itumanaho ku bakiriya hagendewe ku byifuzo byabo.”

Uyu muyobozi yakomeje agira ati “Iyi paki nshya izafasha abakiriya bacu kwiha gahunda bakurikije uko bifite..Ni igisubizo ku mubare w’abakenera internet ukomeza kwiyongera mu gihe bijyanye n’uko abakoresha telefone zigezweho bakoresha porogaramu zikomeye.”

Abakiliya bakunda guhamagara cyane bazabasha guhitamo ipaki zitanga iminota myinshi uhereye kuri GB 2 n’iminota 3000 mu gihe bahamagara kuri Airtel ndetse n’iminota 225 bahamagara ku yindi mirongo mu Rwanda.

Uretse n’ibyo kandi uhabwa Message (SMS) 500 ukoresha wohereza ku bari ku murongo wa Airtel.

Indi paki ni imara iminsi ibiri igura 500Frw, ugahabwa MB 250, iminota 200 uhamagara kuri Airtel n’iminota 15 uhamagara ku wundi murongo mu Rwanda hamwe na message 50 wandikira abakoresha Airtel (073 na 072).

Uguze ipaki igura 1500Frw uhabwa MB 750 n’iminota 700 uhamagaza kuri Airtel, iminota 50 uhamagaza ku yindi mirongo hamwe na sms 150 wandikira abakoresha Airtel , iyi ikaba imara icyumweru.

Ipaki nini Airtel itanga igura 15,000Frw aho umukiliya ahabwa GB 15 n’iminota 3000 uhamagaza kuri Airtel, iminota 500 ahamagaza ku yindi mirongo hamwe na SMS 1500 yandikira abakoresha umurongo wa Airtel, ikamara ukwezi.

2 weeks ago | by Christian Shema

You May Also Like

Loading...

Join our Newsletter